हवेली प्रतिनिधी
हजारो पैलवानांना घडवणारे पैलवान प्रकाश सावंत यांच्या सामाजिक कार्याची राजकारणात एन्ट्री; पत्नी पुष्पलता सावंत जिल्हा परिषद निवडणुकीत उमेदवार
मांजरी (ता. हवेली):
कुस्तीच्या मातीशी आयुष्यभर नातं जपणारे, हजारो पैलवानांना घडवणारे आणि अनेक गरजू खेळाडूंना आश्रय देणारे पैलवान प्रकाश सावंत आता समाजकारणानंतर थेट राजकीय रिंगणात उतरले आहेत. मांजरी येथे “शिवछत्रपती कुस्ती संकुल” या नावाने त्यांनी उभारलेले कुस्ती संकुल हे केवळ प्रशिक्षण केंद्र न राहता संस्कार, शिस्त आणि क्रीडामूल्यांची शाळा ठरली आहे.
ग्रामीण आणि आर्थिकदृष्ट्या दुर्बल भागातील तरुणांना कुस्तीच्या माध्यमातून संधी मिळावी, त्यांचे भविष्य उज्ज्वल व्हावे, या ध्येयाने पैलवान प्रकाश सावंत यांनी अनेक वर्षे अथक परिश्रम घेतले. निवास, आहार, प्रशिक्षण आणि मार्गदर्शन देत त्यांनी शेकडो नव्हे तर हजारो पैलवान घडवले. आज राज्य व राष्ट्रीय स्तरावर चमकणाऱ्या अनेक पैलवानांच्या यशामागे सावंत यांचे मोलाचे योगदान आहे.
या सामाजिक कार्याची पुढील पायरी म्हणून आता त्यांच्या पत्नी सौ. पुष्पलता प्रकाश सावंत या जिल्हा परिषद निवडणुकीच्या रिंगणात उमेदवार म्हणून उभ्या राहिल्या आहेत. त्यांच्या प्रचाराला कुस्तीप्रेमी, युवक, महिला तसेच सर्वसामान्य नागरिकांकडून मोठा प्रतिसाद मिळत असून, सावंत कुटुंबाच्या कार्यावर लोकांचा असलेला विश्वास स्पष्टपणे दिसून येत आहे.
सौ. पुष्पलता सावंत यांनी प्रचारादरम्यान बोलताना सांगितले की, “पतीच्या माध्यमातून आम्ही अनेक वर्षे समाजाची सेवा केली आहे. खेळ, शिक्षण, महिला सक्षमीकरण आणि ग्रामीण विकास या क्षेत्रांत प्रत्यक्ष काम करताना आलेला अनुभव आता जिल्हा परिषदेमार्फत अधिक प्रभावीपणे वापरण्याचा माझा संकल्प आहे.”
कुस्तीच्या मातीने घडवलेली शिस्त, प्रामाणिकपणा आणि संघर्षाची ताकद आता राजकीय व्यासपीठावर दिसणार असल्याने जिल्हा परिषद निवडणुकीत सावंत कुटुंबाची उमेदवारी विशेष लक्षवेधी ठरत आहे. मैदानात पैलवान घडवणारे सावंत आता विकासाचे लढे लढणार अशी भावना नागरिकांतून व्यक्त होत आहे.
मुख्य संपादक
चंद्रकांत दुंडे
संपर्क 8806043369.
